Agartala, 24 Taluang 2022
Tabuksak Jorani Jottoni koktwma Kotor, Sitrang Bankundri (Cyclone) Phainani Koktwmao, Special Charter flight baikhe Hasteo Phaiwi Sokphaikha 119 Adongrokni NDRF ni Kaisa Team. Bohrokni Logio Tubujakha Dodro Nangkukmani Jorao, Samungo thepajaknai Dalbidal Manwi khwnwirok.
Oh Jorao Sitrang Bankundri Bay of Bengal ni kwcharo Tongo. Tangsalo taibo Phan Gwnang Khe, Haste Phaising Swkangwi Phaiwi tongo Sitrang Bankundri.
Kwraksal Phungo Bangladesh oh Kwlai Phainainani Kok tongo Sitrang Bankundri. Bangladesh ni Barisal Ganani Tinkona Island tei Sandeep ni kwchar Amchaio, Hao Kwlainai Kirimasingsa oh Sitrang Bankundri. Ah Jora Nokbar ni Domani tongnai 100 ni Simi 110 Kilometer.
Abo Haikheno Kraksalo Hasteni Dalbidal Amchaio 70 ni Simi 100 Kilometer Dowi, Phaiwi Mano Nokbar Watwi tei Bankundri. Aboni bagwi Tripura Haste Gwnagwi Saklaijakha Red Allert. Oh Tongkhorno Naikolnani bagwi Koktisalo Secretariat oh Haphangni kuchuk Ojamarokno twiwi Khlaijakha Kaisa kokchab Panda.
Abo haikheno Tangsalo Haino hai Haphangni kuchuk Ojamarokno twiwi kokchab Pandao Achukha Hasteni Mantri Okra. Jotto Beremni Tongkhorno Chabnani bagwi Naharjakha Dalbidal Saktharmung. Hati Barsani bagwi Cancel Khlaijakha, Haphangni Jotto Department ni holiday. Phiya ba 24th Oct. ni Simi 26th Oct. Salmari Jora Kholobjak Tongnai Jotto Rwngnok. Tiar Tongnani bagwi Saklaijakha NDRF, SDRF, TSR tei BSF ni Jawanrokno.
Kirimasingsa Bankundri Phainani koktwmao, Twisa tei Twima Rukhungo Aah Romnairokno, Nokni ongkhorya Tongnani bagwi Rwjakha Sakliamung. Biyalo kwlaijak Lukurokno Chubachu Khlainani bagwi Hasteni Jotto NGO tei Club Rokno Chubachuni Samungo ongkhornani bagwi Haste Haphangni Bwkhaktwi Narwkjakha Koimung.
Yang tei khaksa Phasing, Nokbar Watwi ni bagwi Tangsalo, Kolkata to Agartala – Shillong tei Shillong to Agartala – Kolkata, Kolkata to Agartala – Aizawl tei Aizawl to Agartala – Kolkata ni Kainwi Birkhung Cancel Khlaijakha.
Jwngjalo Kwlaijak Lukurokni bagwi, Agartala Municipal Corporation ni Bwkhaktwi Phiyokjakha Helpline Number. AMC Whatsapp Help Line Number – 9863201665, SDM Control Room Sadar – 0381-2325937, Traffic Control – 7005244471, TSECL Whatsapp – 9863596081, Electricity Helpline – 1912 / 0381-2310107.
