Churaibari, 07 Talhing 2022
Chuak nwngwi pukhiri twi tukuna thangwi, twio kwlwgwi thwikha phatar hasteni samungtangnai khoroksa. Thwinai ni mung Jaylal Mridha (50), nok Assam hasteni Karimganj Hangkorbai khopjak Balirbon amchaio. Patimung wnkha Churaibari birindiya tonthai ni Joyram parani Ramthakur Mandir amchaio.
Koktwma bisingtwi saimankha, Swrangsalni sarikgo Jaylal Mridha mungwi khoroksa phatar hasteni samungtangnai, Churaibari Gram Panchayat 1 no. Ward amchaini Manindra Pal ni phukhiri o twi tukuna thangwi, twio kwlwgwi thwio. Thwinai Jaylal, Manindra Pal ni nogo kwbangma bisi romwi samung tangwi tongo.
Nokni bubagra saimanmani ulo, koktwma sahorjakha Premtala horbedek habanogo. Horbedekni sebak patimung thaio thangwi, twio kwlwkjak Jaylal Mridha no Kadamtala sakham nogo twlango. Sakham nainai Jayalal Mridha no naimani ulo, thwikha hwnwi sakha.
Amchaini lukurokno swngwi saimankha, thwinai borok belai chuak nwngno. Swrangsalo chuak nwngwi twi tukuna thangwino o patimung wngo.
Police mamla nawoi, kubui tamo naituknani chengwi rwkha. Mangkwthwino Post-mortem ni bagwi sakham ni morg o tonwi rwjakha. Sangrongsalo mangkwthwi yapharwi rwjaknai nukhungni borokrokni yago.
🟥 Kishan Mallik, Correspondent