Mandwi, Feb 16:
TIPRA mothani chairman Bubagra Pradyot Kishore Debbarma Sangrongsalo vote rwkha Mandwi amchaini vote centre o. Vote rwmani ulo koktwma thumnairokno sakha, “Lukurok chongthwng sabo hasteni achukthaio achuknai, tai ang lukurokno koihoro sep rwnani bagwi’’.
Bubagra vote rwnani bagwi Mandwi amchio yakung beramani logi logi, amchaini lukurok kuthumlawi khulumkha tai okra-chakrarok hamari rwkha kwbangkhe o chongmario kwplai wngna bagwi. Vote rwbaima ulo yasi mari phunugwi sakha, “Chwng kwplai wngnai” hwnwi.
Koktwma thumnairokni bisingtwi lukurokno kok naragwi sakha, “Je jaga norokni Bubagra jotoni hamkraini bagwi saktharwi choba khawi tong, kebono kiriyawi thangwi vote rwbaidi. Tini kebono kirijagwi vote rwya hwnkhe, bwskangni bisiba romwi kiriwi ma tongnai. Ang ani jotono dophani bagwi tai ani Tiprasarokni bagwi saktharwi rwbaikha, tabuk tini norokni jora, norok norokni thinangni bagwi bwswk tamo khai”.
Thangnai Salo, Dhalai district ni kaisa lukuthum pandao sakha, o chongmarini bataimung wngkha BJP tai TIPRA motha ni bisingo. Ang Tripura hasteni joto Bengali bosongni borokrokno sana muchungo, je Tiprasa, Muslim, Christians tai Bengali thansakhe mililai hasteo BJP Sarkarno mechennai hwnwi. BJP party bisiba romwi hasteni lukurokno thokai tongo, aboni bagwi jotono thansani yak romlawi TIPRA motha no kwplai khadi.
Oro sana kwlaio, TIPRA motha ni Greater Tipraland ni demand no kubun party gosiwi naharyani bagwi, saichungno chongmari bataina ongkhorkha TIPRA motha.
Tabuk nainani, bwskangni 2nd March 2023, vote lekhama salo, sabo kwplai wngwi haste sarkarni achukthai swnamno.
