Kamalasagarh, 21 Taluang 2022
CPIM Party khwlaio hwnwi BJP Yuba Morcha khwlainaibai khoroksa CPIM Neta bujakphano khuktwi monogwi simi ma rohorkha. Horni mwnago lathi-usta rwoi bini totra ni rangchak sikol, tai rubber phalmani rang 4000/- bo segwi twlangjakha. Patimung wngkha Kamalasagar Assembly Constituency bai khopjak Natun Colony amchaio, Sangrongsalni horo.
Ulo, Tini Phasalni phungo CPIM neta Nitai Datta, BJP Yuva Morcha khainai Akash Mallik ni mungwi Madhupur thana case diary khaika. O patimungno twi amchaio tungphlalaijak.
Khotwma bisingtwi saimankha, Sangrongsalni horo, nok gana ni thwngnokhlao CPIM neta Nitai Datta himgromwi tongmani. Atumsa Yuva Morcha khainai Akash Mallik bini khorokdok dolrokno tubuwoi phaio. Aphuru Akash Mallik Nitai Datta no swngo, oro tamoni collection khaijagwi tong? hwnwi. CPIM neta Nitai Datta, mungsa collection khaiya hwnwi samani logi logi no, bono khuthumui choproplaikha, te salaikha, “CPIM khaina hwnkhe amchai yakarwi thangdi” hwnwi. Bujakmang bujakmang Nitai Datta haa o girogwi kwlai thango. Haiphano, bini chirikhokma khwnawoi, ganani nokni borokrok kebophano bono chubana phailiya. Ulo Nitai Datta, je chatwi buini nogo kharwi huijakma ulo, bini nukhungni borokrok saimanwi, bono nogo twlangwi thangkha.
Phasalni phungo puila Madhupur PHC o sakham naikoljakmani ulo, Madhupur thanao thangwi Yuva Morcha khainai Akash Mallik ni mungwi case khaikha CPIM neta Nitai Datta.
Koksilchajakha, Akash Mallik swkango CPIM ni jora phuru bo khoroksa sitra tongmung borok tongmani. Hasteo BJP sarkar phaimani ulo, logi logino bemphilwi Yuva Morcha o himna chengkha. Aboni bagwi tabuk bo amchaio bono urpatirwmung borok hwnwi koksilchakha amchaini baksa borokrok.
CPIM neta Nitai Datta, bono kubui raida bai bichar rwjakthwng hwnwi kok koikha. O patimungni bagwi amchaio tungphlalaijak, tai jephuru phano teibo kotor patimung wngwimano hwnwi bisingni koktwma pirjagwi tongo.
By Asish Miyan, Correspondent
