Boxanagar, 26 Taluang 2022
Police tai BSF ni Kwthalaijak Chaitokmungbai 40,000 Siddhi Chara Buphang Tansujakha Baghab ni Panchalia amchaio.
Koktwma bisingtwi saimankha, Baghab, Kalsimura, Boxanagar, Rahimpur, Putia, Maniknagar, Bheluachar hai amchaio siddhi buphang kailaima thakya hwnwi. Haiphano, nukjagwi tongo Sonamura ni Boxanagar amchaino khibiwoi, kubuini amchai rogo siddhi tansujakma eba romjakma aswk khwnaya.
Srangsalo phungni 11 am ni simi 2 pm jora Police bai BSF jawanrok Baghab ni Panchalia amchaio kaibrwi bagan ni 40,000 chara Buphang tansulaikha. Tansujak chara ni rang mari 1 crore wnganw hwnwi sakha police ni tangphang.
Baghab ni Panchalia amchaio kwbangma Siddhi chara kaijak tongo hwnwi Bisingtwi koktwma sogwikha Kalamchoura thana ni OC Bishnupada Bhowmi ni oro tai 150 battalion ni tangphang ni oro. Bisingi kotwma no rwgwi Srangsalo 40,000 Siddhi chara Buphang tansujakha.
Police ni tangphang sakha, omohai samung bwskang salo teibo yapri naharjaknai hwnwi.
🟥 By Mosharaf Hossain, Correspondent
