Agartala, Nov 2022
Samung tangwi chanai rokni khairokmung phunugwi tai borokrokni yakni rang thum thumwi nukhung chalugnairok wngkha Communist rok. Hasteni lukurokni thani kubun lama kwrwi wngwi, kolok bisi romwi phan phunugwi tongrwk kha agi. Tripura hasteo Congress bai Communist rok wngkha bwthai kaisani kainwi bwchwlwi. Chasalo Dhaleshwar Swami Dayalnanda rwngnokni nokhlao, 9 Banamalipur Mandal Yuva Morcha bai songchajak pandao thangwi o kok narak kha kwcham montri-okra eba Rajya Sabha ni MP Biplab Kr. Deb. O pandao puilani simi paithak jora Congress tai CPIM no sejawi kok narak kha bo.
CPIM no sejawi Biplab Kr. sakha, Aswk kolok bisi romwi tongnai kaisa party, bisikba ni bisingo borokrokni puito manya wngjagwi, tabuk kubun party ni yakung swlagwi chongmari ni chobao ongkhorna nawi tongo. Je party ni thinang andra-gundra phaising thangjak, borok se tabuk thokaini puito phunugwi borokrokno imang phunugwi tongo. Politics ni mungwi kolokma bisi rwgwi Communist rok Tripura hasteni borokrokni thinangno hakor bisingo chobwi tonikha.
Mr. Deb teibo sakha, thwngrwngni bagwi borokrokni chasamung tai Sarkar ni kaham samungo kebengna wngkha CPIM rokni samung. O kebengnai party rokno, tabuk teiwaisa Sarkar swnamphinai hwnwi borokrokno thokai tongphio.
Congress no sejawi sakha, Rahul Gandhi je haste twi himbotok khwlai tong, aah hasteni congress adongrok bodol swlawi tabuk BJP party ni bana romwi tongo. Rahul Gandhi ni Bharat Jodo Yatra, tabuk congress baijak yatra wngwi tongo.
Yuva Morcha ni padao majakha BJP Pradesh president Rajib Bhattacharjee, Yuva Morcha State President Nabadol Banik akonsong.
