Talbung 30, 2022
2023 Assembly chongmari ni swkang, congress dol bisingo achukthai kotor seklainani batailaimung chengwi tongkha. Tabukni Congress Achukphang Birajit Sinha no, bini achukthaini khiklainani choba chengwi rwkha Sudip Roy Barman ni bodolrok. Yangphasing, sakni achukthaino romwi narakna bagwi Birajit Sinha hurum-drum nangjak.
Kwraksalo Tripura Pradesh Congressni achukphang Birajit Sinha Belonia amchaio thangwi sakha, Congress ni logi CPIM ni gwdalaimung eba chongmarini bagwi kwthalaimung wngya. Sudip Roy Barman CPIM no logisong naiphano, Birajit Sinha ni chongmung kubunni wansukjak.
Birajit Sinha sakha, ” Communist rokbai bujilaimao thangya, tamni hwnkhe borokni thwngrwngo kwbangma borok-netarokni langma chojak. Kubui-bwkhabai choba khainairokni thwi sokorwi, communist rokbai gwdalmungo thangya”.
Koktwma thumnairokbai bwskangni naharmungno rwgwi kok swngjak phuru Tripura Pradesh Congressni achukphang Birajit Sinha sakha, ” CPIM rokbai chwng Allaince o thangya. Phiyaba, TIPRA Motha party rokbai gwdalwi alliance khainani bagwi kok salainani chaitoklai tongo. Haiphano, thwngrwngni nokbar buphuru biyangtwi sibsawi thangno abo tabuk saimanyakhu”.
Sudip Roy Barman tai Asish Saha bai bini mungsa gothoklaiya wngmani da tong? hwnwi koktwma thumnairokbai swngjakmani ulo, Birajit Sinha atumsa jolijagwi koktwma thumnairokno nongkhorwi thangdi hwnwi chirikhok kha. Congress achukphangni o tongmungno nugwi, pandao o manjakphainai borokrok chajaklailia.
Bwskangni 2023 Assembly chongmarino rwgwi hasteni thwngrwng bodolo jatre-jat tongmung nukjagwi tongo. Tabuk nainani, Congress ni achukphang Birajit Sinha TIPRA Motha party bai koksalai bwswk jora gosirwi mano, eba kubun tamo yapri nahar? Yangphasing, TIPRA motha party Congressni kwcharmungno bwswk jora yachagwi naharno, omono tabuk belai kotor swngmung lukurokni thani.
