Agartala, 29 Talbung 2022
Greater Tipraland sanmungno gosiwi naharma bagwi kwcham montri-okra tai CPIM adong Manik Sarkar ni mangphli sokkha Amara Bangali Party.
Koktwma bisingtwi saimankha, thangnai salo kaisa pandao CPIM adong eba kebengnai bodolni adong-okra Manik Sarkar Greater Tipraland sanmungno gosiwi naharo hwnwi samani ulo, dal-bidal thwngrwng bodolo kok eklaima nukjakha.
Manik Sarkar ni kokno sejawi tai naslewi, Amara Bangali party bini mangphli sogwi khorang tisakha Kraksalo. Rajakhor Shivnagar ni Amara Bangali Pradesh tangnogo, o sejamungni panda khaijago.
Amara Bangali ni adong Gauranga Rudra Pal sakha, “CPIM Neta eba kwcham montri-okra Manik Sakar, CPIM ni kaisa lukuthum padao thangwi Greater Tipraland no gosiwi naharkha. Chwng bini o kok narakmano belai sejao, tamni hwnkhe o Greater Tipraland sanmungni bagwi bwskangni salo Wansa bai Tiprasa ni bisingo jwngjal kobolnai. Chwng Bangali rokni thinang, o sanmungni bagwi biyalo kwlaina nai tongo. Omohai chikonsa party ni sanmungno Manik Sarkar gosiwi naharkha, chwng omono belai sejawo”.
Gauranga Rudra Pal teibo sakha, “Chwng Manik Sarkar ni o kokno naslewo, sejao tai comdemn khwlaio. O CPIM dol Sarkar ni achukphango tongphuru 1978 bisi o ADC sanmungno rwo, borokni amolo Bolongni borok achaio, tai 1980 o danga nango. O ADC wngmani bagwino 1980 ni dangao kwbangma Bangali bwtharjago. Tabuk 2023 ni chongmari o phan kwplai wngnani muchungjagwi Manik Sarkar Greater Tipraland ni Sanmungno gosiwi naharo, chwng bwlai sejao tai naslewo”.
