29 Talbung 2022
Kokgo sajakma tongo, kolijugo Tokgla kochiknai dibor khiring khiring, sal pasanai salthahngo, Thaipung buphango thayanw Thaichwk bwthai. Omohaino nukjakha salnwi swkangni CPIM ni kaisa pandao, kwcham montri-okrani 180 degree gurijak kok saklaimungo.
“Chwng Greater Tipraland sanmungno gosio tai chajago” – CPIM ni kaisa pandao kwcham montri-okra eba Kebengnai bodolni adong-okra Manik Sarkar ni kok samano rwgwi thwngkwrwng rokni bisingo dalbidal wansuklawi ekhreklaima nukjakha. Haste khakma chajakya phano, bahaikhe Manik Sarkar Greater Tipraland ni sanmungno gosikha, abono twi belai elu-melu wnglaijak dol bisingo.
Phan kwmajakmani ulo, teiwaisa sarkarni achukthai mana bagwi da CPIM adong Manik Sarkar o kok sakha? Bo kubui bwkha bai da Greater Tipraland ni sanmungno gosi naharkha? Risa-Rignaino naslejaknai kwcham montri-okra Manik Sarkar, aswk dakti da Tiprasa rokno hamjakha? Omohai dal-bidal swngmung borokrokni bukhugo-bwkhao kasai tongo tabuk. Kebengnai bodol adong-okra ni kok hasteni CPIM bodol eba Politburu gosiwi da naharno, omono tabuk swngmung kotor.
Manik Sarkar sakha, ” Greater Tipraland no support khaio, haiphano nukjakha thangnai bisi kaisa romwi ADC o mungsa samung kaham wngya”. Bo teibo sakha, Tipra motha eba kubun dol phano wngthwng, rang kwrwikhe kaham samung tangwi manya hwnwi.
